綠惜地球就2016年都市固體廢物監察報告之初步回應

中期減廢目標無期
 
(2017年12月27日)六點收工時間先出2016年嘅減廢成績表 — 都市固體廢物監察報告,點解唔再夜d先出?
 
有幾個關鍵數據,大家睇住先:
 
一、家居減廢有成效,2016年每日人均垃圾棄置量為0.87公斤,連續五年減量有成,反映全港每個家庭嘅努力成果。反而工商業嘅減廢成績單就麻麻地,棄置量至少係過去十年最多,達到每日人均0.54公斤嘅水平,直接促成2016年每日嘅平均都市固體廢物棄置量,達到10,345公噸(總量379萬公噸),較2015五年增 加了1.8%。
 
二、按資源藍圖2017年的中期目標,都固人均廢物棄置量要回落至1公斤,但2016年的人均棄置量,是1993年以來的新高 ,達1.41公斤。
 
三、廚餘部分幾諷刺
 
記得喺2016年,政府仲未公布2015年的《都市固體廢物監察報告》嘅結果,就率先話廚餘減量有成:「二○一五年,廚餘於堆填區 的棄置量較二○一四年下降了7.1%。當中家居廚餘棄置量的跌幅(-8.1%)比工商業廚餘棄置量的跌 幅(-4.6%)更為顯著…..這反映各界避免產生、減少及回收再造廚餘的努力漸見成效,政府所訂 立減少廚餘的目標正逐步得以實現。」
 
無諗到事隔一年,2016年嘅報告就指出,「相較2015年,廚餘於堆填區的棄置量上升6.5%,主要由工商業廚餘的升幅所帶動。相反地,家居廚餘人均棄置量下跌至2016年的每日0.32公斤,顯示住戶對減少廚餘的認識日漸加深。工商業廚餘的上升顯示我們需繼續在工商業界宣傳及推動避免產生、減少及回收廚餘。」
 
四、2016年1號膠 (PET) 棄置量再創新高,每日平均棄158公噸或632萬個膠樽,較2015年增加16%。由於石油價格回升等因素,回收率則由2015年的7.6%,輕微回升至2016年的8.5% (註:此前曾錯算為5.8%,僅此致歉)
 
五、報告指出,廢塑料回收率由2015年嘅10.5%,回升至16年嘅14%。表面當然係好事,但其實主要係受惠於石油價格回升 。簡單講,廢膠回收率高定低,政府都係依賴外圍因素。進取一點,不如快啲推塑膠樽嘅生產者責任法規啦。
 
綠惜地球指出,「隨著政府推出保守嘅『三紙二膠』措施,到咗下2018年,減廢嘅回收率極可能會掉頭插水。」綠惜地球就建議,政府應該:
 
• 擴大「二膠」的回收範疇至5、6、7號嘅膠樽;
• 接收公眾較常使用的食物容器等5號膠;
• 政府擴大中央收集廢膠系統至公私營屋苑,健全回收系統,同時挽回公眾對回收系統嘅信心。
 
綠惜地球忠告環保部門做個減廢好學生,唔好拖到放工先公布「成績表」。